2018年6月20日 星期三

推薦小店 — B. Two House

o係香港,要經營一間小店係相當唔容易,天價租金固然係難題,而麻煩既港客更係一絕,所以當我幫襯過唔錯小店既時候,總係想推介俾其他人,等多d人能夠欣賞到之餘亦希望佢地做得住,雖然我都幫唔到咩手。

呢幾年,可能因為租金相對便宜既關係,觀塘工廠區開左唔少食店,早兩日幫襯左間小店,主打自家制比高包,光顧後印象相當不錯,反正呢排個blog無咩野寫,不妨記低當有文update下之餘順便推介一下。

間小店位於成業街既大廈,話左係小店當然唔會大,裝修簡單但環境簡潔舒服,光顧當日係週末下午,其中一名店員係文青打扮少女,相當可人,而女店主則是一位美少婦,有點像陽光版湯洛雯,單係咁樣已經加分啦!不過做人點可以咁膚淺單睇外表野,重要睇埋內涵先得ma,食店都重要睇食物質素同埋服務水準,試過有d食店食物ok但service差勁我都唔會返轉頭。
我一行二人,叫左兩個sets,間野主打比高包,當然叫返個比高包set,煙三文魚比高包+沙律,跟岩鹽㗎啡同甜品,另一個就試試佢既牛角包,香辣牛肉牛角包+迷你卡邦尼意粉,跟餐湯同甜品,另有自助茶水站。食物質素方面,餐湯甜品㗎啡正常水平,主打比高包水準不俗,口感煙煙un un,喜歡食比高包既人應該會鍾意。而牛角包亦夠鬆脆,但個人覺得個餡就唔太match,本來我以為係燒牛肉,但原來係肥牛,如果係燒牛肉就會更加襯。 反而迷你意粉更出色,味道唔錯意粉亦維持口感唔會過淋,可惜當日掛住食無影到相。用膳到尾聲既時候,見到可人店員同另一名少女店員坐隔離枱,枱上放左個同我食既唔同比高包,帶點紫色,見可人店員食好好美味咁,個包重要有餡,斷估係紫薯包,多口問佢係咪同有無得買,美少婦店主聽到答話無得賣啦!因為有餡包較難保存,呢d都只係佢教班所造既,我即大嘆無口福! 之後準備埋單走人,美少婦店主突然叫我等等,嗌個少女店員幫我收錢,自己就去搵野,之後就遞左個紙袋,入面袋左個頭先我話想買既紫薯包,話請我食,原來佢行開係為左拎包俾我,我有點受寵若驚,而店主既媽媽亦話唔洗客氣,有好野梗係要分享,我就卻之不恭道謝收下。 光顧小店,除左食物質素外,呢d咁有人情味既舉動更令人暖心,希望佢地能夠繼續越做越好,等我可以繼續有好野食同感受到呢種人情味, 大家如果有興趣不妨去支持下。


10 則留言:

  1. 賢兄,好明顯個美少婦店主係冧你啦,你唔係咁都睇唔出嘛?

    回覆刪除
    回覆
    1. 😂😂 點會睇得我上眼,況且同老婆一個去

      刪除
    2. 見到你係愛妻號加晒分!

      刪除
    3. 真的嗎? 咁我咪走寶😩

      刪除
  2. 賢兄應upload埋美少婦幅相上來,幫人哋宣傳下嘛🤣

    回覆刪除
  3. 我好膚淺,全篇文只係見到美少婦店主同可人店員

    回覆刪除
  4. 我會去消費一下. 單睇美老闆都值回票價. 哈哈

    回覆刪除