2017年11月18日 星期六

止蝕炒股

o尋日止蝕左早兩日買入既炒股,蝕左成5萬蚊,好鬼肉赤,連埋之前期權蝕既,今年既股息收益全部泡湯啦!當人地重講緊跑贏恆指,我就唔洗輸錢已經偷笑。

當我出post話買d古怪股時,網友已經提醒我,好老實講,今年試過買認沽期權同古怪股,但都慘淡收場,依家檢討,覺得投資/投機方法唔係最大既問題,正如自己初買股都輸過錢,要摸索一段時間,但今年既重大損失,最重要係心態出左問題。

最近呢幾年年結,都總算有小小錢賺,之前又套現左部份股票,手頭上都有一定閒置資金,心態上無以前咁謹慎,而且今年恆指雖然升唔少,但自己d股唔生性,而心水股又覺得未到超值,於是想嘗試下其他方法,於是有之前既買期權同今次既炒古惑股出現,本來試下其他方法倒不是大問題,而今次最大失誤係心態太過輕率,總想一野就贏多d,於是無好好控制下注金額,明知係賭博成分居多,但都投放唔少資金,結果一搏輸就損失嚴重。到底後唔後悔? 當然後悔到爆啦!不知幾揼春,個春袋重痛緊,不過依家犯既失誤,總算來得唔晚,人生重有時間去糾正返,叫做買個昂貴既教訓啦!未來重會唔會繼續其他方法,應該唔抗拒,但要好小心。

10 則留言:

  1. 言兄, 當局者迷:

    9月13日用5萬元買騰訊跌 http://chungyin2717.blogspot.hk/2017/09/2017-09-13.html

    11月7日認輸輸4萬幾元 http://chungyin2717.blogspot.hk/2017/11/700.html

    11月15日開始亂黎用10萬元買古怪野 http://chungyin2717.blogspot.hk/2017/11/blog-post.html

    11月17日再認輸輸5萬

    前後輸近十萬元

    --------------

    切忌心急追返蝕去的, 很容易會更傷, 不要賭博, 穩打穩紥去做吧! 加油!

    回覆刪除
    回覆
    1. 咚兄,之前都否可否認係做錯左啦,唯有食返幾個月面包啦!😩😩😩
      知架啦!唔會再大賭古惑股,少少地期權就唔排除既。

      刪除
  2. 財不入急門,早點知自己不適合賭博未嘗不是一件好事。

    回覆刪除
    回覆
    1. 係既,財不入急門,不過少少地期權都重會嘗試。

      刪除
  3. 我上年試將足球,可唔可以當收入,都冇左50k啦
    我覺得係要試下唔同方向,可唔可以有第條路行,但話明係試,注碼當然係少少咁試,試唔到都冇咁傷嘛

    回覆刪除
    回覆
    1. 我就係衰在想一野就成,變左注碼方面落大左,黎緊會繼續試期權,不過好似你講細注d。

      刪除
  4. 本熊11年歐債危機時段玩中移動權都輸左大十幾幻,用左好多年先追得番,失敗經驗唔可恥,只要能吸取經驗以後唔再犯就是

    回覆刪除
    回覆
    1. 唯有用返d古老格言,失敗乃成功之母安慰下自己啦!不過都要食返一排面包。😫😫😫😫

      刪除
  5. 感覺上言兄有少少想追返大市所以想更加進取?
    我認為可以再檢視餘下股票資產有冇d雞肋野先行套現,再集中兵力增持自己睇好既股票

    始終掟飛鏢好易全軍覆滅(都唔知買左d咩),倒不如趁呢個時候重整兵力慢慢揾自己心目中ok既野

    Sorry ar成日9up tim :(

    回覆刪除
    回覆
    1. 未至於好想追,不過手頭上有閒錢,所以想試下其他玩法,但心深處可能有想追既諗頭。

      刪除