2016年8月18日 星期四

性格決定成就

每個人都希望自己既人生有d成就,但成就取決於唔少因素,運氣我覺得係一個好重要既因素,但除此之外,性格往往影響住你既成就,而我自己既性格,就注定我人生既成就有限。

我既性格,好聽既就係知足,唔好聽就不思長進。由細到大,自己既性格就係咁,做咩都係去到一個夠用既水平,就無動力再去提升,重記得細個既時候,自己運動都有dd天份,玩咩都算快上手,小五小六成日同老豆打羽毛球,算打都ok,上左中學有入校隊既機會,但結果第一次練習我已經無出席,因為我打波純粹for fun,當時覺得d技術已經夠玩,做咩要咁辛苦去練習,有時間放學返去打下機睇下卡通重過癮啦!結果我依家既羽毛球水平只係比當時好少少。到出黎做野,份人工夠洗夠用,所以唔考慮為升職而承擔更多工作量,又唔願離開自己既comfort zone去創業,結果工作收入見頂咁濟。

最近識左一批blog友,佢地都係以財務自由為目標而作投資,除港股外,亦都已經/開始涉足外地既REIT債卷等等,又轉研點樣去借平孖展提高回報,但自己因為港股有少少成績,所以暫感滿足無去研究其他領域。正因呢種性格,相信我要達致財務自由之路會比佢地遲,因為人地踩油gogogo既時候,我就沿途睇風景,或者到我財務自由既時候,已經係退休之時,不過咁都唔差既,總叫晚年無憂,擔憂少一樣野ma。

14 則留言:

  1. 你既工作,係穩定型,當然應該正正常常安安全全完成佢。
    我工作係搵朝唔得晚型,好天收埋落雨柴亦無可口非。
    到七老八十,人人財自/被財自。到時睇下邊個身體健康兒孫滿堂架咋。有冇錢?可能無好過有。

    回覆刪除
    回覆
    1. 我就係不思長進先揀呢d工,安安定定餓唔死但又唔會發達咁啦!
      哈,我鬥少一樣,唔諗住要小朋友,淨係鬥身體健康就得。

      刪除
  2. 呵呵, 人人情況不同, 很難比較呢. 不過, 我認同, 運氣同性格十分影響一個人既成就

    回覆刪除
  3. 賢兄你太humble了吧,平稳上揚也是很不錯的選擇呢。有自己的步伐便好,而且最少有我墊你底,no worry=)

    回覆刪除
    回覆
    1. 我既步伐就係散步,輕輕鬆鬆鄧梓峰。

      刪除
  4. 我反而無玩港股, 國企呢, 哈哈:D

    回覆刪除
    回覆
    1. 你準備緊做美國地產大亨,食晒老美班友d錢

      刪除
  5. 我都係無咩上進心,長駐comfort zone

    回覆刪除
  6. 唔駛爭,仲有我排包尾!

    回覆刪除