2016年8月25日 星期四

16年葉氏中期業績及超短簡評

葉氏化工(00408)公布截至6月30日止6個月業績,期內營業額38.1億港元,按年減少11%,在銷售費用增加及匯兌損失下,錄得溢利5,638萬元,按年減少32%,每股盈利10仙,每股派息5仙。

依家我手頭上得返三隻股票,分別係龍翔、惠記同葉氏,按投入資金黎計,比例大約6:7:1。上個星期,惠記同葉氏都出左中期業績,按理惠記佔大份我應該留意佢份業績先,但睇到葉氏溢利少成三成,派息又少一半,都係睇左佢葉氏入業績先啦!本來有打算出中期業績之後o固日即刻沽止賺左先,因為對比買入價,都有三成回報,而佢又賺少三成又減派息,雖然買得少,不過叫有賺不如袋左落袋先啦!不過睇完中期業績,感覺又ok wow。

雖然中期業績倒退,但已經超過上年全年業績。上年前半年做得唔錯,但下半年應該麻麻,睇葉氏上年全年業績報告,相信油價大跌同人仔貶值對佢好大影響。而油價今年暫時喘定,人仔貶值公司亦做左d野,雖然油價同人仔非公司所能控制,但有過上年經驗,萬一再遇同樣惡劣既情況,唔係業績唔會倒退,不過應該會做得好少少無咁傷既。而今年上半年業績,似乎顯示穩定返落黎,除非油價突然又大跌,否則應該可以保持平穩,派息應該可以維持上年既水平,以自己既買入價,都有6厘4,所以決定繼續持有,但就唔會現價再入,因為就算業績平穩,現價叫合理但唔算平,同超值差好遠,更何況油價點走又預期唔到,所以個人希望就算等唔到超值,都起碼等到平既時候先再入,再持有至相當回報先賣走。

6 則留言:

  1. 其實業績稳定的話,真係不妨hold耐哋~
    到時賺息又賺價,正呢=)

    回覆刪除
    回覆
    1. 其實都係段估,希望將來回望呢個決定無錯啦!

      刪除
  2. 呢類周期性工業股,小弟都有. 感覺上唔少此類股都過左最難捱既階段(2015年下半年). 它們2016上半年(比起2015上半年)可能出現業績下滑, 但只要細心看, 不難發現其實基本利潤率已開始回升, 所以股價呢幾個月升得好勁. 而家右唔算平, 不想追貨, 唯有hold住先.

    回覆刪除
    回覆
    1. 就咁睇如果大圍環境可以保持平穩,呢d股全年業績可以有少少期待,所以我話現價係合理。但亦因為大圍環境對業績有相當影響,現價買承擔呢個風險會大少少,自己唔願承擔呢個風險所以唔追入啦!自己既買入價就算再跌都可以守下咁,再升先再換馬,唯一嫌貨唔多。

      刪除
  3. 慢慢改善中,如果跌低d,我又唔介意買多少少喎

    回覆刪除
    回覆
    1. 我都係咁諗,不過似乎跌唔落wow

      刪除