2020年5月27日 星期三

股息收益 @ 2020-05-25 & 買入網龍 @ 2020-05-27

早幾日25號終於收到互助社既利息, 比往年遲左成個幾月有多, 上年度股息率有3厘, 收16866蚊。

另外o尋日26號以19.5買入一萬股網龍, 不過今日已經蝕唔少, 本來未必會以呢個價入, 不過見岩岩收到少少息手頭又有相當資金, 一時手快就入左, 暫時諗住係長揸, 唔排除跌得多再入。

2020年1月10日 星期五

買入龍翔 + 新增借貸 @ 2020-01-09

o尋日再次死人尋舊路, 以0.6買入400000股龍翔, 8月底做o固23萬借貸就咁用晒, 重要貼添。點知下晝打去銀行問野既時候, 職員sell我稅貸,月平0.11%, 不過淨係可以做12個月, 但因為我個額無乜, 只係借到26000, 老實講個額又少, 年期又短, 真係唔理想, 但又真係幾抵, 計返年息2.46, 每月還2196, total利息343蚊, 2月開始還, 咁岩1月又開始free返1102, 就再借當貼返落買龍翔度。

2020年1月5日 星期日

19年小年結

話咁快就2020年, 係咁易幫19年做個簡單既年結啦!

股票收入: 0
19年淨係買入股票, 無賣出任何股票, 所以呢部份既收入係零。

股息收入: + 84070.16
上年沽清龍翔同惠記, 雖然今年就再入葉氏同買返d龍翔, 不過股息收入方面係比18年萬八蚊左右。

互助社利息: +11466
19年派息同18年一樣係3厘, 不過收益就比上年多近一倍,因為keep住個個月擺錢落去。以一個極低風險但有3厘回報既投資, 都值得擺錢繼續落去。

持股賬面回報: -246400
手頭上得兩隻股, 兩隻都潛緊水。第一持股葉氏,蝕緊208000, 約1成7多d。另一隻龍翔無咁多貨o係手,不過都蝕緊38400, 約一成一多d。

年度回報: +95536.16
股息加互助社利息就已經係全年所有既回報, 就咁睇有近十萬都算ok, 但實際賺股息蝕價, 雖則話一日未沽都係賬面野, 不過都唔理想, 唯有無限補時用消耗時間成本。

2019年11月23日 星期六

股息收益 @ 2019-09-30 & 2019-10-10

月中去完旅行返黎, 洗左三萬三蚊, 不過9月尾同10月中分別收左龍翔7186.36同葉氏27860, 共35046.36, 叫做可以幫補下, 不過都係自欺欺人,兩隻股股價仍然低迷, 遠低過買入價, 收到既股息都未補得返蝕個價, 只能夠勉強當回下血。

2019年8月31日 星期六

又借

銀行keep住間中有打黎撩借錢, 不過息率一路都做唔到之前咁低, 其實都係差dd, 但都無借到。早兩日又打黎, 一開始又係講個話息率, 我就話之前用緊幾多, 如果做唔到就唔需要啦,結果佢再覆我, 都係做唔到, 最盡0.13, 咁我都推左佢, 點知晏d佢再打黎, 話我借個額0.13已經係最低, 唯一可以俾多400蚊coupons, 希望我考慮下, 不過當時我唔多得閒好快就收左佢線。其實我借唔多, 都係23萬, 0.13計返年息都係3.04, 如果扣埋coupons其實都係0.127咁上下, 借23萬可以分60期, 每月都係4133, 而9月我有筆借貸又還完, 10月開始free返1256出黎,每個月都係比依家俾多2千8蚊鬆d, 跟住12月有另一筆又還完, 出年1月又再free 1102, 到時就只係比依家俾多近千8蚊,都係每月還一萬樓下, 負擔唔大, 之後佢又打左幾次黎我又無聽到, 再諗諗下都係決定借先打返轉頭。 好老實咁講, 做我呢d濕9客, 額又唔大但又要算到盡, 打黎又成日唔聽, 銀行職員都好辛苦。

2019年8月10日 星期六

股息收益 @ 2019-06-24 & 2019-07-19

6月同7月都收左一轉息。 6月尾收左龍翔$9223.48。7月就收左葉氏$39800, 不過兩隻股價都潛緊水, 賬面龍翔蝕緊1成1多d, 而葉氏就傷d, 蝕兩成3多d, 收息都只係減少出血量, 所以話咩買貴無買錯, 其實買貴已經係錯, 不過係大錯定細錯姐。

2019年7月4日 星期四

6月開始又多幾舊洗

有一筆借貸, 5月還埋之後就還晒, 6月開始多573蚊洗, 多就唔算多架啦,不過多得少少得少少啦!依家每個月還款就近8100蚊, 佔入息兩成幾, 都算供得輕鬆。最近銀行都有打黎撩借錢, 不過都做唔到之前咁平, 所以無借到, 但其實都係差dd姐, 不過用開咁平就唔願俾貴多dd。 如果有好似之前咁平既息口, 我都想借咁d傍下身。